दसैँ बिदामा प्रसूतिगृहमा मात्रै ओपिडी सेवा, कान्तीमा ४ वीरमा ३ दिन बन्द

लक्ष्मी चौलागाईं/हेल्थपोस्ट
प्रकाशित
२०७५ असोज ३० गते ९:२६

दसैँ बिदामा नियमित तथा आकस्मिक स्वास्थ्योपचार सेवाको उपलब्धता सबैको चासोको विषय हो । रोगले चाडपर्व नभन्ने भएकाले आकस्मिक तथा नियमित उपचारका लागि पनि चाडपर्वको लामो बिदामा स्वास्थ्योपचार सेवा उपलब्ध स्वास्थ्यसंस्थाबारे खुल्दुली हुनु स्वाभाविक छ ।
काठमाडौंका प्रमुख अस्पतालमध्ये थापाथलीस्थित परोपकार प्रसूतिगृहले दसैँ बिदामा समेत बिरामीका लागि ओपिडी सेवा उपलब्ध गराउने भएको छ । दसैँमा अष्टमी, नवमी र दशमी गरी ३ दिन अस्पताल प्रशासन बन्द रहने भए पनि युनिट–युनिट गरी ड्युटी समय मिलाएर ओपिडी सेवा सुचारु गर्ने निर्देशक जागेश्वर गौतम बताउँछन् । उनी भन्छन्, ‘परोपकार प्रसूतिगृह काठमाडौंको एक मात्रै अस्पताल हो, जसले सार्वजनिक बिदामा समेत बिरामीलाई ओपिडी सेवा दिने गरेको छ ।’
अस्पताल २४ घण्टे सञ्चालनमा रहने र नियमित १० देखि १२ जनाको संख्यामा चिकित्सक अस्पतालमा रहने गौतम बताउँछन् । दसैँ बिदाको हरेक दिन, टीकाको दिनसमेत अस्पतालमा चिकित्सक कार्यरत रहने उनी बताउँछन् । तर, टीकाको दिन भने केही समय ब्रेक गराउनका लागि निर्देशन दिएको गौतम बताउँछन् । उनका अनुसार ६ घण्टा ड्युटीमा रहँदा टीकासमेत लगाउन नपाउने अवस्था आउने भएकाले ब्रेक गराउन भनिएको हो । दसैँ, टीका तथा अन्य कुनै पनि कुराले डेलिभरी नरोक्ने भएकाले निरन्तर सेवा दिइने गौतम बताउँछन् ।
दसैँका वेला झन् धेरै जोखिमका केस आउने गरेका छन् । ‘जति बिरामी आउँछन्, जोखिमकै बढी हुन्छन्,’ गौतम अनुभव सुनाउँछन्, ‘त्यसकारण चाडपर्वका वेला चिकित्सकहरू अन्य समयभन्दा झनै व्यस्त ह्ुन्छन् ।’
कान्ती बाल अस्पतालले दसैँ बिदामा जम्मा ४ दिन ओपिडी सेवा बन्द गर्ने भएको छ । अस्पतालका निर्देशक डाक्टर गणेश राईका अनुसार दसैँमा मंगलबारदेखि शुक्रबारसम्म ओपिडी सेवा बन्द रहनेछ । ओपिडी बन्द रहे पनि आकस्मिक सेवा भने २४ घण्टै खुला रहने राई बताउँछन् ।
त्यसैगरी, वीर अस्पतालले दसैँमा ३ दिन ओपिडी सेवा बन्द गर्ने भएको छ । अष्टमी नवमी र दशमीका दिन अस्पतालमा ओपिडी सेवा बन्द रहने निर्देशक भूपेन्द्रकुमार बस्नेतले जानकारी दिएका छन् । उनका अनुसार आकस्मिक सेवा भने हरेक दिन २४ घण्टै खुला रहनेछ ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय