क्यान्सरका बिरामी बढ्दै, नेपालमा ६० हजार

नेपालमा क्यान्सररोगका बिरामी बढ्दै गएको तथ्यांकले देखाएको छ । बिपी कोइराला मेमोरियल क्यान्सर अस्पताल, भरतपुरको तथ्यांकअनुसार हाल नेपालमा करिब ६० हजारभन्दा बढी क्यान्सरका बिरामी छन् । यीमध्ये ९ हजार ५ सय जना उपचारका लागि अस्पतालसम्म आउने गरेको बिपी कोइराला मेमोरियल क्यान्सर अस्पताल भरतपुर क्यान्सर अनुसन्धान विभागका प्रमुख भोला सिवाकोटीले जानकारी दिए । यसमध्ये भरतपुर क्यान्सर अस्पतलामा ५ हजार बिरामी उपचार गर्न आउने गरेका छन् ।

नेपालमा हालसम्म कति क्यान्सरका रोगी छन् र बर्सेनि कतिको मृत्यु हुन्छ भन्ने आधिकारिक तथ्यांक नभए पनि विश्व स्वास्थ्य संगठनको तथ्यांकअनुसार वार्षिक २५ देखि ३० हजार नयाँ बिरामी देखापर्नेे गरेको सिवाकोटीले जानकारी दिए ।
क्यान्सर अस्पताल भरतपुरमा विभिन्न जिल्लाबाट आएका बिरामीमध्ये फोक्सो, पाठेघरको मुख, स्तन, लिम्फग्रन्थि, पेट, रगत, घाँटी, मस्तिष्क, दिसा गर्ने नली र छालाको क्यान्सर प्रमुख रुपमा पाइएको छ ।

विश्वमा हरेक वर्ष करिब १ करोड २० लाख नयाँ क्यान्सरका बिरामी भेटिने गरेका छन् । त्यसमध्ये ९६ लाख व्यक्तिको मृत्यु हुने गरेको भरतपुर क्यान्सर अस्पतालले जानकारी दिएको छ ।
७० प्रतिशत क्यान्सर खानपानका कारण लाग्ने गरेको छ । क्यान्सररोग नियन्त्रणका लागि बिपी कोइराला मेमोरियल अस्पतालले ५४ वटा जिल्लाका स्वास्थ्यकर्मीलाई तालिम तथा ३६ जिल्लाका माध्यमिक विद्यालयका १ हजार ५ सय विद्यार्थीका लागि क्यान्सर रोगथामसम्बन्धी चेतनामूलक कार्यक्रम सञ्चालन गरेको अस्पतालले जानकारी दिएको छ ।

यसैबीच, बिपी कोइराला मेमोरियल क्यान्सर अस्पतालले आफ्नो १४औँ वार्षिकोत्सव तथा १४औँ राष्ट्रिय क्यान्सर सतर्कता दिवस मनाएको छ । ‘क्यान्सरबारे जानकारी राखौँ, सतर्क होऔँ, क्यान्सरलाई परास्त गरौँ’ भन्ने मूल नारासहित अस्पतालले बुधबार क्यान्सर सतर्कता दिवस मनाएको हो ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय