दुर्गममा मेडिकल कलेज खोल्न समिति

कर्णाली अञ्चलको एक मात्रै मेडिकल कलेज कर्णाली स्वास्थ्य विज्ञान प्रतिष्ठानमा एमबिबिएस कक्षा सञ्चालन र पाँच दुर्गम जिल्लामा नयाँ मेडिकल कलेज खोल्नेबारे अध्ययन गर्न सरकारले छुट्टाछुट्टै समिति बनाएको छ ।
शिक्षा मन्त्रालयको ३ भदौको मन्त्रीस्तरीय निर्णयबाट चिकित्सा विज्ञान राष्ट्रिय प्रतिष्ठानका पूर्वरेक्टर डा. श्रीकृष्ण गिरीको संयोजकत्वमा कर्णाली कक्षा सञ्चालन कार्यदल र पाटनका प्राध्यापक मधुसूदन सुवेदीको संयोजकत्वमा अर्को अध्ययन समिति बनाइएको हो । गिरी समितिले कर्णालीमा कक्षा सञ्चालन गर्न पहल गर्नेछ भने सुवेदी समितिले इलाम, पाँचथर, डडेल्धुरा, डोटी र उदयपुरमा मेडिकल कलेज खोल्न सम्भाव्यता अध्ययन गरी सुझाब पेस गर्नेछ ।
यसअघि सरकारले डा. गोविन्द केसीको २७ दिन लामो अनशन अन्त्य गर्ने क्रममा ९ साउनमा यस्तो समिति गठनको सम्झौता गरेको थियो । जुम्लामा स्वास्थ्य विज्ञान प्रतिष्ठान बनेको ८ वर्ष बितिसक्दा पनि एमबिबिएस कक्षा सुरु हुन सकेको छैन । त्यसको विरोधमा डा. केसी १५औँ अनशन कर्णालीको जुम्लास्थित प्रतिष्ठानमा बसेका थिए ।
समितिमा पाटनका रजिस्ट्रर डा. केदार बराल, डा. केसीनिकट चिकित्सक जीवन क्षेत्रीसहित कर्णालीप्रदेश सरकार, प्रतिष्ठान र सुर्खेत अस्पतालका सदस्य छन् । त्यसैगरी, सम्भाव्यता अध्ययन गर्न गठित सुवेदी समितिमा बिपी कोइराला स्वास्थ्य विज्ञान प्रतिष्ठानका डा. शैलेशमणि पोखरेल, शिक्षा मन्त्रालयका सहसचिव डा. हरि लम्साल र सुदूरपश्चिम विश्वविद्यालयका उपप्राध्यापक शंकर भट्ट छन् । समितिमा स्वास्थ्य मन्त्रालयका एक सहसचिव र नेपाल मेडिकल काउन्सिलका प्रतिनिधिसमेत सदस्य छन् ।

Leave a Reply

Your email address will not be published. Required fields are marked *

सम्बन्धित समाचार

  • ताजा समाचार
  • जनप्रिय