सरकारले एक वर्षभन्दा लामो समयदेखि रिक्त भरतपुरस्थित बिपी कोइराला क्यान्सर अस्पताल सञ्चालक समितिको अध्यक्षमा डा. निर्मल लामिछानेलाई नियुक्ती गरेको छ ।

स्वास्थ्यमन्त्री भानुभक्त ढकालको सिफारिसमा सोमबार बसेको मन्त्रिपरिषद्ले डा. लामिछानेलाई अध्यक्ष नियुक्त गरेको हो । पूर्वस्वास्थ्यमन्त्री उपेन्द्र यादवले अध्यक्षका लागि गरेको सिफारिस फिर्ता लिएर ढकालले डा. लामिछानेको सिफारिस गरेका थिए ।

डा. लामिछानेको नियुक्तले क्यान्सर अस्पतालमा लामो समयदेखि रहेको नेकपाका अध्यक्ष दाहालको पकड कमजोर बनेको छ । दाहालले आफूले सिफारिस गरेको उमेदवारलाई पार्टीकै अर्का अध्यक्ष रहेको मन्त्रिपरिषद्बाट अनुमोदन गराउन नसकेका मात्रै होइन्, आफूले नचाहेका मान्छेलाई अध्यक्षको रुपमा देख्नुपरेको छ ।
लामो समय अध्यक्ष नुहँदा अध्यक्षको अनुपस्थितिमा महानगर प्रमुखले छोटो अवधिका लागि जिम्मेवारी पाउँने व्यवस्थाका दुरुपयोग गर्दै छोरी समेत रहेकी रेणु दाहालले नै अध्यक्षको जिम्मेवारी सम्हाल्दै आएकी थिइन् । नयाँ अध्यक्षसँग मेयर दाहालको पकड पनि कमजोर हुने निश्चित छ ।

ऐनले अध्यक्ष बन्नका लागि मान्यताप्राप्त शिक्षण संस्थाबाट चिकित्साशास्त्र विषयमा कम्तीमा स्नातकोत्तर उपाधि हासिल गरी क्यान्सर रोगका क्षेत्रमा कम्तीमा १५ वर्ष काम गरेको चिकित्सक हुनुपर्ने व्यवस्था गरेको छ । क्यान्सररोग विशेषज्ञ नभएको अवस्थामा मान्यताप्राप्त शिक्षणसंस्थाबाट चिकित्साशास्त्र विषयमा कम्तीमा स्नातकोत्तर उपाधि हासिल गरी स्वास्थ्य क्षेत्रमा कम्तीमा २० वर्षको अनुभवप्राप्त वरिष्ठ चिकित्सकमध्येबाट अध्यक्ष बनाउन सकिन्छ ।

अध्यक्षका लागि नेकपा अध्यक्ष दाहालले न्यौपानेलाई चाहेका थिए । त्यसबीचमा डा. विदुर वस्तीले समेत पहुँच बढाएपछि ढकालले तेस्रो पात्रको रुपमा यसअघि अस्पतालको डेपुटी डाइरेक्टर रहेका न्यूरो सर्जन लामिछानेलाई छानेका थिए ।

चर्चामा रहेका अन्य पात्रको तुलनामा डा. लामिछाने पार्टीलाई समर्थन गरे पनि सफ्टलाइनर मानिन्छन् । तर, उनीभन्दा अन्य धेरै चिकित्सक अस्पतालमा वरिष्ठ भएकाले उनलाई नेतृत्व सम्हाल्न कठिन हुनसक्ने बुझाइ चिकित्सकहरुको छ । नेकपाभित्रको आन्तरिक राजनीतिक खिचातानीमा फरक दल भएपनि दाहालसँग निकट मानिने पूर्वस्वास्थ्यमन्त्री उपेन्द्र यादवले दाहाल अनुकूलता र पकड जोगाइदिन उनकै सिफारिसमा डा. विजय न्यौपानेको सिफारिस गरेका थिए । तर, ओलीले त्यसलाई मन्त्रीपरिषद्मै लान दिएनन् । यादव बाहिरिएसँगै ढकाल मन्त्री बनेपपछि ओलीले चाहेजस्तै हुने अवस्था आएको हो । योसँगै अस्पतालको १४ सदस्यीय सञ्चालक समिति हालै रिक्त ६ सदस्य नियुक्ति पनि दाहालले चाहेजस्तो नहुने स्पष्ट भएको छ ।

स्रोतका अनुसार अध्यक्षका लागि नेकपा अध्यक्ष दाहालले न्यौपानेलाई चाहेका थिए । त्यसबीचमा डा. विदुर वस्तीले समेत पहुँच बढाएपछि ढकालले तेस्रो पात्रको रुपमा यसअघि अस्पतालको डेपुटी डाइरेक्टर रहेका युरो सर्जन लामिछानेलाई छानेका थिए । नयाँ नियुक्तिको प्रभाव र असर आगामी वैशाखदेखि रिक्त हुने कार्यकारी निर्देशक को बन्ने भन्ने सन्दर्भलाई समेत प्रभाव पार्ने चिकित्सकहरु बताउँछन् । गत असोजमा तत्कालीन अध्यक्ष डा. प्रकाशराज न्यौपानेको कार्यकाल सकिएलगतै पद रिक्त छ ।